~ أش هادشي ؟
هادي income.community ، مجتمع ديال المغاربة اللي خدامين فالويب ولا باغيين يخدمو فيه. هنا كنتلاقاو، نتبادلو الأفكار، المهارات، والطرق الصحيحة باش كل واحد يقدر يدخل طرف ديال الخبز حلال من الأنترنيت . كنتعاونو مع بعضياتنا بعيد على السبام ، الكذوب ، التخربيق ... و إيلا كان شي مشكل ، كنبارطاجيوه ونلقاو ليه الحل مجموعين .
~ واش هادشي بالفلوس ولا مجاني ؟
التسجيل فالمجتمع مجاني . ولكن التبرع ديالك هو اللي غادي يعاوننا نغطيو مصاريف السيرفر، اشتراكات الـAPI اللي كنستعملو، بما فيها API ديال الذكاء الاصطناعي، وكذلك باش نقدرو نستمرو فالتطوير وتحسين المجتمع. باش تكونو على اطلاع ونتأكدو من الشفافية الكاملة ، كلشي كاين فصفحة الداعمين والمصاريف ديالنا income.community/supporters تما غادي تلقاو لائحة بأسماء المتبرعين (بالإسم الحقيقي أو المستعار)، وأيضا تفاصيل المصاريف الشهرية ديال المجتمع income.community/expenses. هادشي كيعني أن كل درهم كتبرعو بيه كيمشي مباشرة لهاد الأهداف وكيساهم فبقاء واستمرار المجتمع .
~ واش كاينة شي حاجة على التوعية فهاد المجتمع ؟ بحال كيفاش الواحد يحضي راسو من النصابة ديال الويب ؟
أكيد ، وبزاف كاع! ماشي غير بلاصة فين كنتعلمو المهارات وندخلو الفلوس ، ولكن حتى فين كنفيقو بعضياتنا . هنا كنركزو على توعية الناس بكل ما كيدور فالويب ، خصوصاً الطرق اللي كيستعملوها النصابة ، سواء اللي كيبيعو كورسات خاويين ، أو اللي كيوهمو الناس بالربح السريع . غانفضحو هاد الطرق كاملة باش كلشي يحضي راسو ومايبقاش يتيق . الهدف هو كل واحد فينا يوعى مزيان و يعرف يفرق بين الطرق لي عندها اساس و بين دوك الطرق ديال السبام والتخربيق اللي كتخلي بنادم يعيش الوهم و يضيعو وقتو و فلوسو .
~ واش يمكن يتحظر شي واحد من community؟ شنو هوما أسباب الحظر؟
أه بطبيعة الحال ! هاد الكوميونيتي عندها قوانين واضحة ، وأي واحد ما كيحترمهاش كيتحظر نهائياً . الأسباب ديال الحظر : استعمال السبام أو نشر المعلومات الكاذبة ، التضليل المتعمد أو محاولة النصب على الأعضاء ، قلة الاحترام مع أي عضو من الكوميونيتي أو التجريح ، استعمال الدين او العاطفة لغرض استغلال الناس . نشر أي محتوى مضر أخلاقياً أو دينياً . وأهم حاجة، إيلا تحظرتي ، النظام كيبقى عاقل على الـ IP ديالك، داكشي علاش غادي يتم حظرك تلقائياً إيلا درتي حساب آخر . لهذا عافاك، خص أي واحد يلتزم بهادشي ويحافظ على المجتمع ديالنا نقي ومفيد للجميع . ملاحظة : في حالة تم حظرك غادي نبلغك بسبب حظر في ايميل .
~ واش ممكن ننتقد إيلا شفت شي حاجة مشي هي هديك؟
بطبيعة الحال! هاد المجتمع الهدف ديالو هو هادا بالضبط. أي حاجة شفتيها مشي هي هديك، ممكن تعطي الرأي ديالك بحرية كاملة وتقدر تنتقد أي عضو كيما كان، بالاحترام والوضوح. وبلاتي هي أحسن! حتى أنا كمول هاد الكوميونيتي، إيلا بان ليك شي خطأ درتو، فمن حقك تنتقدني بطبيعة الحال. ومن حقي أنا نجاوبك ونناقش معاك الموضوع. مرحب بالجميع وهاد المجتمع أي واحد دخلو هو حر فيه مادام كنهضرو على أي حاجة كتعلق بالويب. المهم نبقاو فالإطار ديال الاحترام المتبادل والهدف ديالنا جميعاً هو نتعلمو ونفيدو بعضياتنا. النقد البناء هو اللي كيخلينا نتطورو ونصححو الأخطاء ديالنا.
~ كا و لا ما كا ؟
سمكة!
~ علاش هاد الكوميونيتي ماشي كلها مكتوبة بالعربية ، واخا هي للمغاربة ؟
سؤال في محله ! income.community الأساس ديالها تبنى على كوميونيتي بالإنجليزية ، ولكن الأهم من هادشي هو أن أغلب المصادر والمعلومات القيمة فالويب كتكون باللغة الإنجليزية . بزاف ديال المصطلحات التقنية و الكلمات المفتاح فهاد المجال صعيب تلقى ليهم ترجمة عربية دقيقة و مفهومة بحال الأصل . داكشي علاش ، واخا كنستعملو الدارجة المغربية بيناتنا باش نتواصلو بسهولة ، كنخليو الباب مفتوح حتال الإنجليزية باش كلشي يستافد . المهم عندك كامل الحرية تهضر بالدارجة بالإنجليزية أو حتى تخلط بيناتهوم .
~ واش نقدر نعطي معلومات الحساب ديالي لصحابي ولا شي واحد آخر يدخل بيه ؟
رد بالك !! كل تسجيل فهاد الكوميونيتي هو شخصي ومخصص ليك بوحدك . السيستم عندي مصمم باش يراقب هادشي . إيلا السيستم لقط بلي كاين جوج ديال الناس ولا كثر كيدخلو بنفس الحساب ، خصوصاً من بلايص (عناوين IP) مختلفة بشكل متكرر ، فالحساب ديالك غادي يتبانا بشكل تلقائي و نهائي . الحفاظ على حسابك مسؤوليتك
~ شنو هي المواضيع ولا المجالات اللي مكتناقشوهاش هنا؟
سؤال مهم باش كلشي يكون فالصورة . أي مجال فيه شبهة أو معروف أنه حرام بشكل واضح ، راه مكانهضرش عليه نهائياً . فمثلاً ، حوايج بحال تداول و الدروبشيبينغ اللي فيه غموض كثير أو الاشتراكات ديال IPTV و مجالات أخرى مشابهة ، هادو مكنقربوش منهم . بالعكس ، ممكن تلقى عندنا توعية علاش هاد المجالات فيها إشكال شرعي أو مافيهاش البركة ، باش الناس تفهم وتحضي راسها. الحمد لله ، كاينين بزاف ديال المجالات الحلال و فيها البراكة و مبينة على اساس صحيح و على مدى طويل . وبحكم أن التخصص ديالي (أنا كصاحب الكوميونيتي) هو فالتطوير والرقمنة ، وخصوصاً فمجال الـSaaS (البرامج كخدمة) فغالباً المواضيع ديالنا غتكون قريبة لهادشي . يعني ، غنهضرو بزاف على حوايج بحال المنتجات الرقمية (Digital Products) ، بناء وتطوير الـSaaS ، التجارة الالكترونية (ecommerce) ، العمل الحر (Freelancing) ، تحسين محركات البحث (SEO) ، صناعة المحتوى ، التسويق عبر الإيميل بالطرق شرعية و كل ما يتعلق بالبزنيس الرقمي النقي والمستدام .
~ شكون هوما الناس اللي تقدر تقول عليهم ماشي ديال هاد الكوميونيتي ؟
صراحة ، هاد المجتمع ماشي لأي واحد . إيلا كنتي من دوك الناس اللي عايشين الوهم و مأثرين بهدرة الخاوية بحال "نطحنو الدولار"أو عايش فالوهم ديال الربح السريع بلا مجهود (ضرب و هرب) ، أو باغي تتعلم طرق الغش والتحراميات والسبام والسكام (Scam) هاد البلاصة ماشي ديالك . حنا هنا كنركزو على الخدمة بصح ، بناء مهارات حقيقية وطرق شرعية و مستدامة باش الواحد يدخل طرف ديال الخبز حلال و فيه البركة و مستدام . المجتمع ديالنا للناس الجادة اللي باغا تخدم على راسها وتبني مستقبلها فالويب بطريقة نقية .
~ علاش دخلتي حتى الذكاء الاصطناعي يتفاعل ويجاوب معانا فالمجتمع ؟
هادي نقطة مهمة بنسبة ليا . دخلت AI لمجتمع لجوج أسباب رئيسية ومكملة لبعضها . أولاً ، باش يعاونا بمعلومات صحيحة ومفصلة . الذكاء الاصطناعي عندو قدرة يوصل لمصادر معرفة واسعة ، وهادشي كيساعدنا نلقاو أجوبة لأسئلتنا بسرعة ونفهمو حوايج جداد . ثانياً ، وهذا هو الأهم بالنسبة لينا ، هو التدريب ديالو على التحقق من المعلومات اللي كيطرحها كل واحد فينا . الهدف هو ماشي غير نتبادلو المعرفة ، ولكن نتأكدو أن داكشي اللي كنقولو صحيح ومبني على أساس . الـAI غادي يساعدنا فهاد العملية باش كل عضو يقدر يحصل على معلومات دقيقة مفصلة وموثوقة . الهدف الأكبر هو كل واحد فينا يوعى بهاد المسائل ويعرف كيفاش يحمي راسو ويمشي فطريق نقية ومبنية على عمل جاد ومعرفة صحيحة بعيد على الوهم . ومزال كنخدم على تطوير موديل ذكاء اصطناعي خاص بـ income.community ، غادي يكونو موديلات بحال Claude، Gemini، و Grok. الهدف منو هو يكون متناغم كثر مع الاحتياجات ديالنا هنا فالكوميونيتي ، راه باقي كنخدم عليه باش يتأقلم معانا مزيان .
~ واش نقدر نشارك المشاريع ديالي، المحتوى ديالي، أو القناة ديالي على يوتيوب هنا فالكوميونيتي؟
أه، طبعاً ممكن! كنرحبوا بمشاركة أي مشاريع شخصية، محتوى تعليمي، أو قنوات يوتيوب إيلا كانت كتفيد الأعضاء ديالنا و عندها علاقة بمجال الويب (بحال التطوير، التصميم، التسويق الرقمي، صناعة المحتوى، إلخ). الشرط الأساسي هو أن هادشي لي غادي تشارك يكون فعلاً كيقدم قيمة مضافة للمجتمع، و بعيد كل البعد على أي شكل من أشكال النصب، الاحتيال، أو الترويج لشي حاجة ما واضحاش.
~ واش نتا درتي هاد community لاسباب ربحية؟
بصدق غادي نجاوبك بلي هاد الكوميونيتي درتها لأهداف اللي هي التوعية مشي باغي نربح منها كهدف أولي . الأسباب الأخرى هي نشر الأفكار ديالي والتجربة ديالي ، ومنتجات ديالي فحالة كنت غادي تكون عندها قيمة اضافية . أنا شخصياً كنشوف بلي كاين بزاف ديال المعلومات الخاطئة والطرق المضللة فالويب و بغيت نساهم فتوعية الناس و ندير واحد مجتمع فيه كاين تبادل التجارب الناس ثم استفادة منها . إيلا كان عندي شي منتج أو خدمة فالمستقبل وشفت بلي غادي تفيد الأعضاء ديالنا وعندها إضافة حقيقية عليهم ، طبعاً غادي نبيعها ونبارطاجيها معاكم. هادشي طبيعي وماكاينش فيه مشكل مادام المنتج كيقدم قيمة فعلية كما انت اذا عندك مشروع او منتج بغيت تنشرو مادام المنتج كيقدم فعلا واحد قيمة اضافية ، و في الاخير الهدف الأول و الأخير هو نبنيو مجتمع قوي ومفيد للجميع ، ونحاربو الأوهام والطرق الخاطئة اللي كثيرة فهاد المجال .
~ كلمة أخيرة ؟
أهم حاجة عندنا فهاد الكوميونيتي، واللي كنطلبو من كل واحد وكل وحدة معانا يلتزم بيها ، هي نخليو هاد الفضاء نقي ومفيد أهم حاجة عندنا فهاد الكوميونيتي ، واللي كنطلبو من كل واحد وكل وحدة معانا يلتزم بيها ، هي نخليو هاد الفضاء نقي ومفيد للجميع. شنو كنقصدو بهادشي ؟ أولاً : مايكونش بيناتنا احتكار للمعلومة . اللي عرف شي حاجة تفيد خوه ، يبارطاجيها . كلنا هنا كنتعلمو من بعضياتنا، والرزق على الله . ثانياً : الكلام السوء، التجريح أو التقليل من أي واحد ممنوع منعاً باتاً . بغينا جو ديال الاحترام والتقدير المتبادل . نقدرو نختلفو فالآراء ولكن ديما فالإطار ديال الأدب. ثالثاً : الثقة هي الأساس. كنتيقو فيكم باش تبارطاجيو معلومات صحيحة ومفيدة في مقابل دكاء استطناعي غادي راقب المعلومات لي ماشي صحيحة . كنتيقو فيكم باش تحافظو على مصداقية الكوميونيتي وماتستغلوهاش فأمور ماشي هي هاديك . بالمختصر، income.community ديالنا كاملين . كلما حافظنا عليها وعلى الجو الزوين اللي فيها، كلما غنستافدو منها كثر وغتكبر بطريقة صحيحة .